Германия футбол иттифоқи (DFB) вице-президенти Ханс-Йоахим Ватцке ФИФА президенти Жанни Инфантинони лавозимидан кетишга чақирди.
«У кетиши керак. Ҳеч қандай «аммо» ва «агар»ларсиз», — деди Ватцке.
У Инфантино фаолиятини танқид қилиш учун учта асосий сабабни келтирди: АҚШ президенти Дональд Трампга ФИФА Тинчлик мукофотининг топширилиши, АҚШ терма жамоаси ҳужумчиси Фоларин Балогуннинг дисквалификацияси бекор қилиниши ва жаҳон чемпионати билан боғлиқ тижорий ҳуқуқларни хусусий инвесторларга бериш режаси.
Ватцке сўнгги ташаббусни «мутлақо ақлга сиғмайдиган ғоя» деб атади.
«Бу ҳақда ҳеч ким ҳеч нарса билмаган. ФИФА вице-президентлари ҳам, ФИФА кенгаши ҳам бехабар бўлган.
Сизга инвесторлар нима учун керак? Улар умуман керак эмас. ФИФА жуда катта маблағга эга. Аслида бу пуллар бизга — миллий футбол ассоциацияларига тегишли», — деди Ватцке.
Аввалроқ ҳам ФИФАнинг мазкур инвестиция режаси шаффофлик ва бошқарув масалалари бўйича танқидларга сабаб бўлган. ФИФА эса ушбу лойиҳани бекор қилган ва унинг таҳлилини ФИФА кенгашига тақдим этишини маълум қилган.
