«ПСЖ» ҳужумчиси Усман Дембеле «Олтин тўп»ни ким қўлга киритиши кераклиги ҳақида ўз фикрини билдирди. Франциялик футболчи ўзини энг яхши деб ҳисоблаётган Ламин Ямал ва Килиан Мбаппедан фарқли равишда, шахсий номзодини илгари суришни истамади.

«Шахсан мен ўзимга эътибор жалб қилишни ёки мукофотлар учун ўз номзодимни илгари суришни ёқтирмайман. Бу мен учун қийин. Мен учун энг муҳими — майдонда жамоадошларинг билан бирга бошдан кечирадиган лаҳзалар, қўлга киритилган совринлар, шунингдек, оилам, яқинларим ва бутун «ПСЖ» билан бирга нишонлайдиган ғалабалар. Айнан мана шулар энг гўзал лаҳзалар», — деди Дембеле Ligue 1+ платформасига берган интервьюсида.

«Мен учун ҳозир Кварацхелия дунёнинг энг яхши футболчиси. Агар у «Олтин тўп»ни қўлга киритса, жуда хурсанд бўлардим, чунки у ҳақиқатан ҳам бу мукофотга муносиб. У ажойиб мавсум ўтказди ва барча кўрсаткичлар бўйича ушбу совринни олишга ҳақли», — деди француз футболчиси.

Усман Дембеле «Олтин тўп»нинг амалдаги соҳиби ҳисобланади. Бу йилги тақдирлаш маросими 26 октябрь куни Лондонда бўлиб ўтади.