Лондоннинг «Арсенал» клуби келажакни режалаштиришда ва ҳужум чизиғини кучайтиришнинг турли вариантларини баҳолашда давом этмоқда. TEAMtalk нашрининг хабар беришича, Дортмунднинг «Боруссия» клуби ҳужумчиси Максимилиан Байер лондонликларнинг қизиқишлари доирасига тушиб қолган.

Манба маълумотларига кўра, «Арсенал» скаутлари 23 ёшли германиялик футболчини юқори баҳолашмоқда ва унинг ўйинини диққат билан кузатиб боришмоқда. Клубдагилар у Англия Премьер-лигасига идеал даражада мос тушади деб ҳисоблашмоқда, унинг ўйин услуби эса канонирлар ҳужумчиси Кай Хаверцни ёдга солади.

Иккала футболчи ҳам «буш ҳудудларни сезиш инстинктига» эга ўйинчилар сифатида таърифланади. Хабар қилинишича, Байерни фақат «Арсенал» кузатмаяпти. «Манчестер Юнайтед» ва «Тоттенхэм Хотспур» ҳам ёзда ушбу ҳужумчига қизиқиш билдиришган эди.