Хави Эрнандес Лионель Мессининг "Барселона"даги таъсири ҳақида гапирар экан, аргентиналик футболчини баскетбол афсонаси Майкл Жорданга қиёслади.
The Prakhar Gupta Xperience лойиҳасига берган интервьюсида собиқ ярим ҳимоячи Месси қийин учрашувларда "Барселона"га ҳал қилувчи устунлик берганини таъкидлади.
"Таркибингизда Месси бўлиши Майкл Жордан билан бир жамоада ўйнашдек эди.
Жамоа 20 дақиқа давомида ўйинини топа олмай қолса, Лео олдинга чиқарди, голли вазият яратарди ёки жарима зарбасидан гол урарди", — деди Хави.
У Мессини "Барселона"нинг "яширин қуроли" деб атаб, унинг меҳнатсеварлиги ва ғалабага бўлган кучли интилишини алоҳида таъкидлади.
Хави ва Месси "Барселона"да 11 мавсум бирга тўп тепиб, 4 марта Чемпионлар лигаси ва 7 марта Ла Лига ғолиблигини қўлга киритган.
