Sky Italia хабарига кўра, «Ювентус» Камиль Грабаранинг оғир жароҳатидан сўнг Нетуни жамоага қайтариш имкониятини кўриб чиқмоқда.
Польшалик дарвозабон «Аталанта»га қарши ўйин арафасида ўнг тиззасининг олдинги хочсимон боғламини узиб олди ва узоқ муддатга сафдан чиқди.
Шу муносабат билан Турин клуби Гульельмо Викариога ўринбосар бўла оладиган янги иккинчи дарвозабон изламоқда. Асосий номзодлардан бири — 2015–2017 йилларда ҳам «Ювентус» шарафини ҳимоя қилган Нету.
37 ёшли бразилиялик футболчи «Ботафого»ни тарк этганидан сўнг эркин агент мақомида турибди ва расмий таклифни кутмоқда. Унинг молиявий талаблари юқори эмаслиги музокараларни осонлаштириши мумкин.
«Юве» келишувни яқин 24 соат ичида якунлашни режалаштирмоқда. Бу ҳолатда янги дарвозабон терма жамоалар ўйинлари муносабати билан юзага келадиган танаффус пайтида тўлиқ тайёргарликдан ўтиш имконига эга бўлади.
