«Арсенал» ярим ҳимоячиси ва жамоа сардори Мартин Эдегор яқин вақт ичида клуб билан шартномасини узайтириши мумкин. Бу ҳақда TEAMtalk хабар берди.
Манба маълумотига кўра, «канонирлар» бош мураббий Микель Артета билан янги шартнома борасида келишувга эришганидан сўнг, клуб раҳбарияти Эдегор билан шартномани узайтириш масаласига эътибор қаратган.
Футболчининг ўзи ҳам «Арсенал»да узоқ муддат қолишга тайёр. Томонлар янги келишувга жуда яқин турибди.
Эдегор 2021 йилдан буён «Арсенал» шарафини ҳимоя қилиб келмоқда. Жорий мавсумда 27 ёшли норвегиялик футболчи барча мусобақаларни ҳисобга олганда саккизта учрашувда майдонга тушиб, тўртта гол урди.
Эдегорнинг Лондон клуби билан амалдаги шартномаси 2028 йил ўрталаригача мўлжалланган.
