«ПСЖ» бош мураббийи Луис Энрике жамоанинг ҳужумкор ярим ҳимоячиси Дро Фернандеснинг жисмоний тайёргарлигидан норози. «Барселона» тарбияланувчиси январь ойида парижликлар сафига қўшилган бўлса-да, бу мавсумда унга етарлича ўйин амалиёти берилмаяпти.
El Nacional нашри хабар беришича, Энрике Фернандесга кескин талаб қўйган. Мураббий футболчи жисмоний тайёргарлигини яхшилаши ва бутун эътиборини фақат футболга қаратиши кераклигини билдирган. Акс ҳолда, «ПСЖ» Фернандес билан хайрлашиш вариантини кўриб чиқиши мумкин.
Луис Энрике 18 ёшли футболчининг иқтидорини юқори баҳолайди. Бироқ мураббий уни фақат истеъдоди учун асосий таркибга киритмоқчи эмас. Энрике футболчилардан юқори суръатга дош бериш, рақибга босим ўтказиш ва майдонда юқори интенсивликда ҳаракат қилишга тайёр бўлишни талаб қилади. Унинг фикрича, Фернандесга ҳозирча жисмоний тайёргарлик етишмаяпти.
