Исроил ва Ирландия терма жамоалари Миллатлар лигасидаги икки ўйиндан кейин футболка алмашмасликка қарор қилди.

Ирландия футбол ассоциацияси 4 октябрь куни бўлиб ўтадиган жавоб учрашуви олдидан режалаштирилган барча медиатадбирларни бекор қилади.

Маҳаллий RTE телеканали ҳам фақат ўйиннинг ўзини тўғридан-тўғри намойиш этади. Учрашув олдидан студия, экспертлар таҳлили ва бошқа қўшимча дастурлар бўлмайди.

The Independent маълумотига кўра, Ирландия бош мураббийи Хеймир Хадльгримссон ва Исроил устози Бен Шимон ҳам ўйин олдидан анъанавий қўл бериб кўришмайди.

Икки федерация ўртасидаги зиддият Хадльгримссоннинг Фаластиндаги воқеалар ҳақидаги баёнотидан кейин кучайган. У Исроилга қарши учрашувда Ирландия «геноцидга қарши ўйнайди», деган фикрни билдирган. Бен Шимон эса бунга жавобан уни «ақлсиз инсон» деб атаган.

Натижада ҳар икки учрашув нейтрал майдонда ўтказилади.

27 сентябрь куни жамоалар Венгриянинг Дебрецен шаҳрида, 4 октябрь куни эса Бачка-Тополада ўзаро баҳс олиб боради.

Ирландия УЕФАдан жамоаларни бир-бирига қарши қўймасликни сўраган, аммо бу талаб рад этилган.