Самарқанд шаҳрида байдарка ва каноэда эшкак эшиш бўйича XV Осиё чемпионати ниҳоясига етди. Қитаънинг ўттизга яқин давлати вакиллари иштирокида ўтказилган мазкур нуфузли мусобақада Ўзбекистон терма жамоаси аъзолари 15 та олтин, 15 та кумуш ва 15 та бронза медалига сазовор бўлиб, умумжамоа ҳисобида биринчи ўринни эгаллашди.

Терма жамоамиз муваффақиятига Вадим Меньков, Сергей Борзов, Алексей Мачалов, Серик Мирбеков, Вячеслав Горн, Юля Цой, Екатерина Зоркова, Осман Кестан, Екатерина Шубина, Ксения Кочнева, шунингдек, Владимир Потофеев, Элёр Мамадалиев, Марлин Сеинтягяев, Дилноза Рахматова, Темур Хайдаров, Артур Гулиев каби ўнлаб спортчиларимиз муносиб ҳисса қўшдилар.

Қитъа чемпионати доирасида Осиё байдарка ва каноэ федерациясининг конгресси ҳам ўтказилди. Унда 29 давлат вакиллари иштирок этишди. Ўзбекистон байдарка ва каноэ федерацияси бош котиби Василий Корбутнинг таъкидлашича, Осиё байдарка ва каноэ федерациясининг шу пайтга қадар ўтказилган конгрессида бу қадар кўп давлат вакиллари иштирок этишмаган. Конгрессда спортнинг ушбу турини қитъада янада тараққий эттириш борасида қатор масалалар муҳокама қилинди.

Конгрессда Осиё байдарка ва каноэ федерациясининг раҳбари Шокин Нарито (Япония) кўпчилик овоз билан яна тўрт йил муддатга ана шу нуфузли ташкилотга раҳбар этиб сайланди.