"Рома" Римнинг шимолидаги Пьетралате ҳудудида янги стадион қуриш лойиҳасини келишиш жараёни якунланганини эълон қилди. Клуб бу воқеани янги арена қурилиши йўлидаги тарихий босқич деб атади.
"Рома"нинг янги стадиони лойиҳаси 2022 йил октябридан бошлаб бир неча йил давомида ишлаб чиқилди ва зарур идоралар билан келишилди. Энди клуб лойиҳанинг кейинги босқичига ўтади.
Режага кўра, қурилиш ишлари 2027 йил март ойида бошланиб, 2031 йилга қадар якунланиши керак. Янги стадион Италия ва Туркияда бўлиб ўтадиган Евро-2032 мусобақаси ареналари рўйхатига киритилиши ҳам кўзда тутилмоқда.
"Рома" таъкидлашича, янги стадион нафақат клуб ва унинг мухлислари учун уй аренаси бўлади, балки янги имкониятлар яратадиган, атрофдаги ҳудуд ривожига ҳисса қўшадиган ва бутун шаҳар ҳамда унинг аҳолисига узоқ муддатли фойда келтирадиган муҳим иншоотга айланиши кутилмоқда.
