«Барселона» вингери Энтони Гордон Англияни тарк этганидан кейин унга бўлган муносабат ўзгарганини айтди.

Каталония гранди 25 ёшли футболчини жорий мавсум олдидан «Ньюкасл»дан 80 миллион еврога сотиб олган эди.

«Менимча, кўпчиликнинг кўзида бошқа футболчига айландим. Англияда мени асосан тезлигим ва прессингдаги ҳаракатларим учун қадрлашарди, аммо техник ва тактик сифатларим кўпинча эътибордан четда қоларди. Назаримда, нималарга қодир эканимни фақат жамоадошларим тўлиқ тушунишарди.

Англияда одамлар мени шунчаки жуда тезкор ва агрессив футболчи деб билишарди. Испанияда эса ўйинни тушуниш қобилиятим ва тўп билан ишлаш маҳорати ҳақиқий баҳоланди.

«Барселона»да агар сенга техника ёки ўйин тафаккури етишмаса, дарҳол сендан воз кечишади. Мен ўзимда одамлар кўрганидан кўра кўпроқ имконият борлигини ҳис қилардим. Шу сабаб чет элга кўчиб ўтишим мен учун жуда муҳим бўлди», — дея Гордоннинг сўзларини Barca Universal келтиради.

Англиялик футболчи «Барселона» сафида 7 та ўйинда 5 та голли узатма амалга оширди, аммо ҳозирча гол ура олмади.