«Манчестер Юнайтед» ва «Арсенал» «Порту» ҳимоячиси Алберту Коштани ўз сафига қўшиб олиш имкониятини ўрганмоқда, деб хабар беради CaughtOffside.

Манба маълумотига кўра, 22 ёшли португалиялик футболчини «Манчестер Сити» ва «ПСЖ» ҳам кузатиб бормоқда. Ҳозирча расмий таклифлар йўқ — клублар футболчини скаутинг босқичида ўрганмоқда.

Трансферни амалга ошириш осон бўлмаслиги мумкин. «Порту» Кошта учун «Ювентус»га 15 миллион евро ва бонуслар тўлаган ҳамда футболчи билан 2030 йил июнига қадар шартнома имзолаган.

Унинг шартномасидаги товон пули 65 миллион еврони ташкил этади. Шунингдек, «Ювентус» Коштанинг келажакдаги трансферидан олинадиган фойданинг 10 фоизини олиш ҳуқуқини сақлаб қолган.

«Манчестер Юнайтед»да Кошта ҳимоянинг ўнг қанотида рақобатни кучайтириши ва клубнинг ёш футболчиларга ставка қилиш сиёсатига мос келиши мумкин.

«Арсенал» эса унинг тактик жиҳатдан универсаллигига қизиқмоқда. Микель Артета бир нечта позицияда ҳаракат қила оладиган ва тўп назоратида фаол иштирок этадиган ҳимоячиларни қадрлайди.

2025/26 йилги мавсумда Кошта «Порту» сафида 47 та ўйин ўтказиб, 1 та гол урди ва 8 та голли узатма амалга оширди.

Transfermarkt портали футболчининг бозор қийматини 18 миллион еврога баҳоламоқда.