«Манчестер Сити» ишини тергов қилган мустақил комиссия клуб футболчиларнинг имидж ҳуқуқлари билан боғлиқ молиявий манипуляциялар амалга оширган, деган хулосага келди.
Ўтган ҳафта «шаҳарликлар» Англия Премьер-лигаси молиявий қоидаларини бузишга оид деярли барча айбловлар бўйича айбдор деб топилгани ҳақида хабарлар тарқалган эди. 2023 йил февраль ойида АПЛ «Сити»ни 2009–2018 йиллар оралиғида молиявий қоидаларни 115 марта бузганликда айблаган. Кейинроқ The Times аслида гап 130 та қоидабузарлик ҳақида кетаётганини маълум қилди. Бунга Премьер-лига айбловларни илк бор эълон қилган пайтда айрим қоидаларни ҳисоблашда юзага келган чалкашлик сабаб бўлган.
Кеча АПЛ клуб барча айбловлар бўйича айбдор деб топилганини маълум қилди.
«2012 йилнинг учинчи чорагида клуб Longbow деб номланган лойиҳани ишга туширган. Биз клубнинг Longbow бир нечта йўналишни қамраб олган ва клуб даромадларини ошириш ҳамда операцион зарарларни камайтириш йўлларини ўрганишга қаратилган лойиҳа бўлгани ҳақидаги тушунтиришини қабул қиламиз. Longbow доирасидаги кўплаб йўналишлар ушбу мақсадларга эришишга қаратилган ҳалол ва қонуний уринишлар эди. Аммо улардан бири бундай эмасди — бу Fordham билан тузилган келишув эди», — дейилади комиссия қарорида.
Вердиктга кўра, «Манчестер Сити» Fordham компанияси билан келишув тузган. Комиссия бу компания амалда клуб эгаси бўлган Abu Dhabi United Group (ADUG) учун «ниқоб» вазифасини ўтаган, деган хулосага келган.
Комиссия фикрича, «Манчестер Сити» футболчиларнинг имидж ҳуқуқларини Fordham компаниясига сунъий равишда оширилган нархларда сотган. Ушбу битимларни молиялаштириш учун эса Abu Dhabi United Group маблағларидан фойдаланилган.
Шунингдек, Fordham ўз имидж ҳуқуқларини «Манчестер Сити»га берган футболчиларга тўловлар амалга оширгани кўрсатилган, аммо комиссия хулосасига кўра, амалда бу пуллар клуб эгалари томонидан тўланган.
Шу тариқа, Fordham билан тузилган келишув ADUGга «Манчестер Сити» ҳисобларига қўшимча маблағларни операцион даромад кўринишида киритиш, уларнинг ҳақиқий манбасини яшириш, шунингдек, футболчиларнинг имидж ҳуқуқлари билан боғлиқ харажатларни молиявий ҳисоботларда акс эттирмаслик имконини берган.
Натижада ушбу келишув орқали клуб даромадлари 24,5 миллион фунтга сунъий равишда оширилган, харажатлар эса 49,414 миллион фунтга кам кўрсатилган.
