"Ливерпуль" ярим ҳимоячи Алексис Мак Аллистерга янги шартнома таклиф қилмоқчи эмас. Бу ҳақда Bernabeu Digital хабар берди.
27 ёшли аргентиналик футболчининг амалдаги шартномаси 2028 йил июнига қадар мўлжалланган. Манба маълумотига кўра, у жорий мавсум якунида клубни тарк этиши мумкин.
Аввалроқ Макаллистер ёзда "Ливерпуль"дан кетиш эҳтимоли бўлганини тан олганди. Шунингдек, у клуб ҳануз янги шартнома таклиф қилмаганидан қаттиқ хафа эканини айтган.
Футболчи атрофидаги вазиятни мадриднинг "Реал" клуби диққат билан кузатиб бормоқда. Испания гранди яқин вақт ичида аргентиналик ярим ҳимоячини сотиб олишга уриниб кўриши мумкин.
Мак Аллистерга "Манчестер Сити" ҳам қизиқиш билдирмоқда.
Агар аргентиналик футболчи жамоани тарк этса, "Ливерпуль" унинг ўрнига "Борнмут" ярим ҳимоячиси Алекс Скотт ёки "Монако" футболчиси Ламин Камарани олиб келишни кўриб чиқиши мумкин.
