Мадриднинг «Реал» клуби ярим ҳимоячи Жуд Беллингем билан янги шартнома борасидаги музокараларда олға силжишга эришди. Клуб шартномани узайтириш жараёнини йил охирига қадар якунлашни режалаштирмоқда. Бу ҳақда TEAMtalk хабар берди.

Манбага кўра, «Қироллик клуби» 23 ёшли ярим ҳимоячи билан амалдаги шартномани яна икки йилга — 2031 йилга қадар узайтирмоқчи. Шунингдек, «қаймоқранглилар» футболчининг йиллик маошини 20 миллион евродан 30 миллион еврогача оширишга тайёр.

Янги шартнома имзоланган тақдирда, Беллингем Килиан Мбаппе ва Винисиус Жуниор каби ҳужумчилар билан бир хил даражада маош олади. «Реал»да ярим ҳимоячининг келажакда «Олтин тўп»ни қўлга киритиш имконияти бор, деб ҳисоблашмоқда.

Беллингем 2023 йил ёзидан буён Испания гранди шарафини ҳимоя қилиб келмоқда. Жорий мавсумда у барча мусобақаларда 8 та учрашувда иштирок этиб, 3 та гол урди ва 3 та голли узатмани амалга оширди.

Transfermarkt маълумотларига кўра, футболчининг бозор қиймати 160 миллион еврони ташкил этади.