Жанубий Корея ёшлар терма жамоаси Осиё ўйинлари финалида Японияни 1:0 ҳисобида мағлуб этди. Мусобақалар доирасида кореяликлар кетма-кет тўртинчи марта чемпион бўлди.
Тақдирлаш маросимида Жанубий Корея миллий мадҳияси янграй бошлаган пайтда мамлакат байроғи чалкашиб қолди. Ташкилотчилар муаммони тезкорлик билан бартараф эта олмади. Chosun Biz маълумотига кўра, иккинчи ўринни эгаллаган Япония ва учинчи бўлган Хитой байроқлари эса ҳеч қандай муаммосиз кўтарилиб турган.
Бу ҳолат кореялик мухлисларнинг норозилигига сабаб бўлди. Японияда эса воқеа оддий хатолик билан изоҳланиб, Жанубий Кореяни ҳақорат қилиш нияти бўлмагани таъкидланмоқда.
Қайд этиш жоиз, Осиё ўйинлари давомида Жанубий Корея билан боғлиқ норозилик уйғотган биринчи ҳолат бу эмас. Аввалроқ кореялик спортчини тақдирлаш маросимида Жанубий Корея мадҳияси ўрнига Шимолий Корея мадҳияси янграган эди.
Шунингдек, эркаклар баскетбол турнири финали олдидан Корея терма жамоаси учун ажратилган автобус кечикиб келган. Манбага кўра, бу жамоанинг тайёргарлигига салбий таъсир кўрсатган.
