Janubiy Koreya yoshlar terma jamoasi Osiyo o‘yinlari finalida Yaponiyani 1:0 hisobida mag‘lub etdi. Musobaqalar doirasida koreyaliklar ketma-ket to‘rtinchi marta chempion bo‘ldi.

Taqdirlash marosimida Janubiy Koreya milliy madhiyasi yangray boshlagan paytda mamlakat bayrog‘i chalkashib qoldi. Tashkilotchilar muammoni tezkorlik bilan bartaraf eta olmadi. Chosun Biz ma’lumotiga ko‘ra, ikkinchi o‘rinni egallagan Yaponiya va uchinchi bo‘lgan Xitoy bayroqlari esa hech qanday muammosiz ko‘tarilib turgan.

Bu holat koreyalik muxlislarning noroziligiga sabab bo‘ldi. Yaponiyada esa voqea oddiy xatolik bilan izohlanib, Janubiy Koreyani haqorat qilish niyati bo‘lmagani ta’kidlanmoqda.

Qayd etish joiz, Osiyo o‘yinlari davomida Janubiy Koreya bilan bog‘liq norozilik uyg‘otgan birinchi holat bu emas. Avvalroq koreyalik sportchini taqdirlash marosimida Janubiy Koreya madhiyasi o‘rniga Shimoliy Koreya madhiyasi yangragan edi.

Shuningdek, erkaklar basketbol turniri finali oldidan Koreya terma jamoasi uchun ajratilgan avtobus kechikib kelgan. Manbaga ko‘ra, bu jamoaning tayyorgarligiga salbiy ta’sir ko‘rsatgan.