Хорватиялик собиқ футболчи Иван Ракитич "Барселона"нинг бош мураббий Ханс-Дитер Флик қўл остидаги муваффақиятли ўйинлари ҳақида фикр билдирди.

Флик 2024 йил ёзида Хави Эрнандес ўрнини эгаллаб, "кўк-анорранглилар" бош мураббийига айланган эди. Шундан буён жамоа ички мусобақаларда юқори натижалар қайд этиб, томошабоп ҳужумкор футбол намойиш этмоқда.

"Флик ўзининг немисча менталитети билан жамоада ажойиб муҳит яратди, ижобий фикрлашни сингдирди ва тўғри ишлаш маданиятини йўлга қўйди", — деди Ракитич Radioestadio Noche билан суҳбатда.

Собиқ ярим ҳимоячи, шунингдек, қизларидан бири "Барселона"ни фаол қўллаб-қувватлашини ҳам айтди.

"Катта қизим "Барселона"нинг ашаддий мухлиси. У Педри ва Ямални жуда яхши кўради. Кичик қизим эса "Севилья"га мухлислик қилади", — деди хорватиялик футболчи.

Иван Ракитич 2014 йилдан 2020 йилгача "Барселона" шарафини ҳимоя қилган.