«Интер» бош мураббийи Кристиан Киву мураббийлик фаолиятига ёндашуви ҳақида гапирди ва совринларни қўлга киритган бўлса-да, ҳануз ўзини ўқувчи деб ҳисоблашини айтди.
«Умрим давомида шу иш билан шуғулланаман, деб ўйламайман. Ҳали ҳам ўзимни ўқувчидай ҳис қиламанми? Ҳа, ишга ва қилаётган барча ишларимга ёндашувим шундай. Шубҳалар менга қизиқувчанлигимни сақлаб қолиш ва қулайлик зонамдан чиқишга ёрдам беради», — деди Киву Cronache di Spogliatoio нашрига берган интервьюсида.
Руминиялик мутахассис ривожланиш истагини сақлаб қолар экан, ўз устида ишлашда давом этишини таъкидлади.
«Ўзимни ўқувчи сифатида кўришни тўхтатганимда, тўхташ учун муносиб вақт келган бўлади. Ўқиш ва янги чақириқлар менда ишга бўлган иштиёқ ва ғайрат билан давом этиш истагини сақлаб туради».
Киву бошчилигида «Интер» ўтган мавсумда Италия чемпионати ва Кубогида ғолиб бўлди.
