Италиянинг «Комо» клуби спорт директори Карлальберто Луди жамоа ярим ҳимоячиси Николас Пас Лионель Мессидан кейин Аргентина миллий терма жамоасининг 10-рақамли футболкасини кийишга муносиб эканини таъкидлади.

39 ёшли Месси миллий терма жамоадаги фаолиятини якунлаганидан сўнг, унинг афсонавий 10-рақами кимга насиб этиши мумкинлиги ҳақида фикрлар билдирилмоқда.

Лудининг ҳисоблашича, «Комо» сафида тўп тепаётган Николас Пас ушбу масъулиятни ўз зиммасига олиш учун етарли салоҳиятга эга.

«Агар 10-рақам шунчалик муҳим бўлса ва у муносиб инсон ҳамда жуда кучли футболчига насиб этиши керак бўлса, менимча, Нико бу рақамни кийишга қодир», — дея Лудининг сўзларини келтиради Goal нашри.

Шунингдек, «Комо» спорт директори жамоасининг Италия А Сериясида чемпионлик учун курашиш имкониятлари ҳақида ҳам фикр билдирди.

«Биз ҳозир чемпионлик учун курашиш ҳақида ўйламаяпмиз. Ўтган йили ҳам Чемпионлар лигасига чиқиш ҳақида ўйламаган эдик.

Биз бор эътиборимизни кундалик ишимизга қаратганмиз ва мавсум давомида мақсадларимизни босқичма-босқич белгилаб борамиз», — деди Луди.

Маълумот учун, «Комо» айни пайтда Италия чемпионати турнир жадвалида 10 очко билан саккизинчи ўринни эгаллаб турибди.