Мадриднинг «Реал» клуби бош мураббийи Жозе Моуриньо жамоага қайтиши ҳақидаги гап-сўзларга қандай муносабат билдирганини айтди.

Дастлабки миш-мишлар ўтган мавсум якунланишидан анча олдин, португалиялик мутахассис «Бенфика»ни бошқариб турган пайтда пайдо бўлган. Июнь ойида эса у расман «қироллик клуби»нинг янги бош мураббийи сифатида таништирилди. Моуриньо Альваро Арбелоанинг ўрнини эгаллади.

«Реал»га қайтишим ҳақида гаплар тарқалганида, мен бунга эътибор бермадим ва буни оддий миш-миш деб ўйладим. Клуб мавсум ўртасида Арбелоани тайинлаганди, унинг натижаларини баҳолашга ҳали эрта эди, аммо шов-шувлар бошланиб кетди. Лекин менга ҳеч ким ҳеч нарса демаган эди.

Мен бу ҳақиқат бўлиши мумкин эмас, деб ўйладим. Диққатим “Бенфика”га қаратилган эди. Одатда, шов-шувлар томонлар ўртасидаги биринчи алоқадан кейин бошланади. Аммо бу сафар аксинча бўлди: мен билан ҳеч ким боғланмаган, миш-мишлар эса аллақачон тарқалиб улгурган эди», — дея Моуриньонинг сўзларини Madrid Zone нашри келтирмоқда.

63 ёшли мураббийнинг «Реал» билан шартномаси 2029 йилгача амал қилади.