Венгриянинг «Залаэгерсег» клуби миллий чемпионатнинг навбатдаги турида «Ньиредьхаза»га қарши ўйин учун таркибни ғайриоддий тарзда эълон қилди. Жамоа асосий таркибда футболчиларнинг исмлари ўрнига итларнинг суратлари ва лақабларини жойлаштирди.

Бу акция бошпанасиз итларга бағишланган ташаббус доирасида амалга оширилди, деб хабар берди клубнинг расмий сайти. Жамоа шу йўл билан эгасиз ҳайвонлар муаммосига эътибор қаратиш ва уларни янги оилаларга жойлаштириш ташаббусини қўллаб-қувватлашни мақсад қилган.

«Залаэгерсег» Венгрия чемпионати турнир жадвалида 11-ўринда бормоқда. Жамоа саккизта турдан кейин олти очко тўплаган. «Ньиредьхаза» эса саккиз очко билан 10-ўринни эгаллаб турибди.

Мазкур учрашув Венгрия чемпионатининг 9-тури доирасида 11 октябрь, якшанба куни бўлиб ўтади. Баҳс «Шоштои Ит» стадионида ўтказилади.