Лондоннинг "Арсенал" клуби ярим ҳимоячиси Деклан Райс жамоа бош мураббийи Микель Артета билан шартнома узайтирилганига муносабат билдирди.
Яқинда испаниялик мутахассис "тўпчилар" билан 2030 йил ёзигача мўлжалланган янги келишув имзолади.
"Артетанинг янги шартнома имзолаб, бу ерда яна тўрт йил қолиши ажойиб янгилик. У билан ишлаётганимиз биз учун катта омад.
Мураббий бошқалар кўра олмайдиган майда жиҳатларни ҳам пайқай олади.
У сени доимо кузатиб туради, ҳатто сен унинг эътиборидан четда қолдим, деб ўйлаган пайтингда ҳам.
Артета кутилмаган саволлар бериб, сени сергак тортишга мажбур қилади ва гапларига қулоқ солаётганингни текширади.
У барчани доимо ҳушёр ҳолатда ушлаб туради.
Учрашувлар давомида биздан нима талаб қилинаётганини аниқ биламиз. Тактикани энг майда жиҳатларигача тушунамиз.
Айнан шунинг учун мен Артетани энг яхши мураббий деб ҳисоблайман", — дея Райснинг сўзларини келтиради Arsenal Radar.
Микель Артета 2019 йил декабрь ойидан буён "Арсенал" бош мураббийи лавозимида ишлаб келмоқда.
