Londonning "Arsenal" klubi yarim himoyachisi Deklan Rays jamoa bosh murabbiyi Mikel Arteta bilan shartnoma uzaytirilganiga munosabat bildirdi.
Yaqinda ispaniyalik mutaxassis "to‘pchilar" bilan 2030 yil yozigacha mo‘ljallangan yangi kelishuv imzoladi.
"Artetaning yangi shartnoma imzolab, bu yerda yana to‘rt yil qolishi ajoyib yangilik. U bilan ishlayotganimiz biz uchun katta omad.
Murabbiy boshqalar ko‘ra olmaydigan mayda jihatlarni ham payqay oladi.
U seni doimo kuzatib turadi, hatto sen uning e’tiboridan chetda qoldim, deb o‘ylagan paytingda ham.
Arteta kutilmagan savollar berib, seni sergak tortishga majbur qiladi va gaplariga quloq solayotganingni tekshiradi.
U barchani doimo hushyor holatda ushlab turadi.
Uchrashuvlar davomida bizdan nima talab qilinayotganini aniq bilamiz. Taktikani eng mayda jihatlarigacha tushunamiz.
Aynan shuning uchun men Artetani eng yaxshi murabbiy deb hisoblayman", — deya Raysning so‘zlarini keltiradi Arsenal Radar.
Mikel Arteta 2019 yil dekabr oyidan buyon "Arsenal" bosh murabbiyi lavozimida ishlab kelmoqda.
