Лондоннинг «Арсенал» клуби бош мураббийи Микель Артета 16 ёшли истеъдодли футболчи Макс Доуманнинг ривожланиши ҳақида фикр билдирди.

Ўтган ойда «тўпчилар» тарбияланувчиси Англия Лига кубоги доирасида «Ипсвич»га қарши учрашувда иккита гол урган эди. Мазкур баҳс «Арсенал»нинг 4:2 ҳисобидаги ғалабаси билан якунланган.

Премьер-лигада «Лидс»га қарши якшанба куни бўлиб ўтадиган учрашув олдидан журналистлар Артетадан клубда Доуманнинг эрта эришган муваффақиятлари унинг бошини айлантириб қўймаслиги учун қандай чоралар кўрилаётганини сўрашди.

«Бу барчамизнинг умумий масъулиятимиз. Бироқ бу борада, аввало, Макснинг ота-онаси масъул. Чунки у вақтининг катта қисмини улар билан ўтказади.

Менимча, унинг ҳолатида бу масала бўйича жиддий хавотирга ўрин йўқ.

Сабаби, унинг энг катта истаги — футбол ўйнаш ва ўзининг энг яхши жиҳатларини намойиш этиш. Унинг бутун эътибори айнан шунга қаратилган», — деди Артета матбуот анжуманида.

Макс Доуман жорий мавсумда «Арсенал»нинг асосий жамоаси сафида иккита учрашувда иштирок этди.