Londonning «Arsenal» klubi bosh murabbiyi Mikel Arteta 16 yoshli iste’dodli futbolchi Maks Doumanning rivojlanishi haqida fikr bildirdi.
O‘tgan oyda «to‘pchilar» tarbiyalanuvchisi Angliya Liga kubogi doirasida «Ipsvich»ga qarshi uchrashuvda ikkita gol urgan edi. Mazkur bahs «Arsenal»ning 4:2 hisobidagi g‘alabasi bilan yakunlangan.
Premyer-ligada «Lids»ga qarshi yakshanba kuni bo‘lib o‘tadigan uchrashuv oldidan jurnalistlar Artetadan klubda Doumanning erta erishgan muvaffaqiyatlari uning boshini aylantirib qo‘ymasligi uchun qanday choralar ko‘rilayotganini so‘rashdi.
«Bu barchamizning umumiy mas’uliyatimiz. Biroq bu borada, avvalo, Maksning ota-onasi mas’ul. Chunki u vaqtining katta qismini ular bilan o‘tkazadi.
Menimcha, uning holatida bu masala bo‘yicha jiddiy xavotirga o‘rin yo‘q.
Sababi, uning eng katta istagi — futbol o‘ynash va o‘zining eng yaxshi jihatlarini namoyish etish. Uning butun e’tibori aynan shunga qaratilgan», — dedi Arteta matbuot anjumanida.
Maks Douman joriy mavsumda «Arsenal»ning asosiy jamoasi safida ikkita uchrashuvda ishtirok etdi.
