Собиқ футбол ҳаками Эдуардо Итурральде Гонсалес Испания Ла Лигасининг 8-туридан ўрин олган «Реал» — «Вильярреал» учрашувида (1:0) Винисиус Жуниорнинг майдондан четлатилишига муносабат билдирди.

Баҳснинг 72-дақиқасида бош ҳакам Исидро Диас де Мера видеотакрорни кўриб чиққач, бразилиялик футболчининг голини бекор қилди ва унга қизил карточка кўрсатди. Бунга Винисиуснинг ҳужум давомида «Вильярреал» ярим ҳимоячиси Натан Салибанинг сочидан тортиши сабаб бўлди.

«Винисиус Беллингемнинг ҳаракатини тўхтатиб қолиши мумкин бўлган футболчининг сочидан тортди. Бу қоидабузарлик ҳисобланади. Кейин ҳакам сочдан тортиш қанчалик кучли бўлганини баҳолаши керак.

Ҳакам бу ҳаракатни кучли тортиш деб баҳолагани учун қизил карточка кўрсатди. Майдондан четлатиш қарори мутлақо тўғри.

Катта эҳтимол билан, Винисиус икки ўйиндан тўрт ўйингача дисквалификация қилинади», — деди Итурральде Гонсалес.