"Пари Сен-Жермен" ҳужумчиси Усмон Дембеле жамоада етарлича ўйин амалиётига эга бўлмаётганидан норози.

Парижликлар бош мураббийи Луис Энрике 29 ёшли футболчининг муҳим учрашувларга оптимал жисмоний ҳолатда етиб боришини таъминлаш мақсадида унга тез-тез қўшимча дам беришни маъқул кўрмоқда.

Бироқ L'Equipe нашрининг хабар беришича, Дембеле мураббийнинг бундай ёндашувидан қониқмаяпти. Франциялик ҳужумчи жисмоний тайёргарлигини бир маромда сақлаб туриш учун оддий учрашувларда ҳам кўпроқ майдонга тушиши керак, деб ҳисобламоқда.

Унинг фикрича, мунтазам ўйин амалиёти муҳим баҳсларда 90 дақиқа давомида юқори суръатни сақлаб қолиш ва жисмонан толиқмасдан ҳаракат қилиш учун зарур.

Маълумот учун, Усмон Дембеле жорий мавсумда "ПСЖ" сафида барча мусобақалар доирасида 7 та учрашувда иштирок этиб, 2 та гол урди ва 4 та голли узатмани амалга оширди.