"Аякс" бош мураббийи Мичел жамоа дарвозабони Марк-Андре тер Штегеннинг ўйинини танқид қилиб, уни ҳайкалга қиёслаган журналистга жавоб қайтарди.
Матбуот анжумани давомида журналистлардан бири германиялик голкипернинг тўпни ҳаддан ташқари узоқ ушлаб туришини танқид қилиб, уни машҳур Мадам Тюссо музейидаги мум ҳайкалга ўхшатди.
Ушбу қиёс "Аякс"нинг ҳимоядан ҳужумга ўтишдаги секин ҳаракатлари ва тўпни ўйинга киритиш услубидан норози бўлаётган мухлислар кайфиятини ҳам акс эттиради.
Бироқ нидерландияликлар бош мураббийи бундай таърифга қўшилмаслигини билдирди.
"Уни ҳайкал деб таърифлашингизга қўшилмайман", — деди Мичел.
Шу билан бирга, испаниялик мутахассис жамоа тўпни тезроқ ҳаракатлантириши ва ҳужумларни жадалроқ ташкил этиши зарурлигини тан олди.
Эслатиб ўтамиз, 34 ёшли Марк-Андре тер Штеген жорий йил ёзида "Барселона"дан ижара асосида "Аякс" сафига қўшилган эди.
Германиялик дарвозабон жорий мавсумда Нидерландия чемпионатидаги битта учрашувдан ташқари барча баҳсларни асосий таркибда бошлаган.
