Миланнинг "Интер" клуби таянч ярим ҳимоячиси Александар Станкович фаолиятини Англия Премьер-лигасида давом эттириши мумкин.
Бу ҳақда Испаниянинг Diario AS нашри хабар бермоқда.
Манба маълумотига кўра, Англия Премьер-лигасининг бир нечта клуби 21 ёшли сербиялик футболчини ўз сафига қўшиб олишга қизиқиш билдирмоқда. Улар Станковичнинг трансфери учун 40 миллион евро миқдорида таклиф тайёрламоқда.
Ҳозирча футболчига қизиқиш билдираётган клубларнинг номлари ошкор қилинмаган.
Станковичнинг ўзи айни пайтда "Интер"ни тарк этишни талаб қилиш ниятида эмас. Бироқ унинг жамоада етарлича ўйин амалиётига эга бўлмаётгани вазиятни ўзгартириши мумкин.
Жорий мавсумда сербиялик ярим ҳимоячи Италия А Сериясида атиги учта учрашувда майдонга тушди. Ушбу баҳсларда у жами 44 дақиқа ҳаракат қилган.
Эслатиб ўтамиз, "Интер" ўтган ёзги трансферлар ойнасида Станковични Бельгиянинг "Брюгге" клубидан 23 миллион евро эвазига сотиб олган эди.
21 ёшли футболчининг миланликлар билан амалдаги шартномаси 2031 йилга қадар мўлжалланган.
