«Астон Вилла» бош мураббийи Унаи Эмери УЕФА Чемпионлар лигаси доирасида Туркиянинг «Фенербахче» клубига қарши бўлиб ўтадиган учрашув олдидан ўз фикрлари билан ўртоқлашди.
Испаниялик мутахассис матбуот анжуманида рақибнинг салоҳияти, таркибидаги ўзгаришлар ва жамоасининг бўлажак баҳсга тайёргарлиги ҳақида гапирди.
Эмери ўтган йили Истанбулда «Фенербахче»га қарши ўтказилган учрашув осон кечмаганини эслаб, бу сафар ўз майдонида тўп суришини таъкидлади.
«Ўтган йили Истанбулда жуда қийин учрашув ўтказгандик. Энди эса ўз майдонимизда ўйнаймиз.
Уларнинг таркибида айрим футболчилар алмашган, бош мураббий ҳам ўзгарган. Ҳозир биз рақибнинг ўйинини тактик жиҳатдан таҳлил қиляпмиз», — деди Эмери.
Шунингдек, «Астон Вилла» устози Туркия клубининг ҳозирги имкониятларига юқори баҳо бериб, бўлажак учрашувда жиддий рақобат кутаётганини маълум қилди.
«Эртанги ўйин қийин кечишини кутяпман. Уларда яхши футболчилар ва кучли мураббий бор. «Фенербахче» — Европанинг кучли жамоаларидан бири.
Уларнинг футболчилари жуда юқори савияга эга. Клуб Европа миқёсидаги мусобақаларда муваффақиятли рақобатлаша олади.
Биз рақибни ҳурмат қиламиз. Эртага эса ўз ўйин режамиз асосида ҳаракат қилишга интиламиз», — дея қўшимча қилди мутахассис.
Маълумот учун, «Астон Вилла» ва «Фенербахче» ўртасидаги учрашув 14 октябрь куни УЕФА Чемпионлар лигаси умумий босқичининг 2-тури доирасида бўлиб ўтади.
Баҳс Тошкент вақти билан 15 октябрга ўтар кечаси соат 00:00 да бошланади.
Мазкур учрашувни словакиялик ҳакам Иван Кружляк бошчилигидаги ҳакамлар бригадаси бошқариб боради.
