Ўзбекистон Суперлигасининг 24-тури доирасида “Локомотив” ва “Насаф” жамоалари ўртасидаги учрашув 0:0 ҳисобида якунланди.

Баҳс давомида ҳар икки жамоа гол уриш учун ҳаракат қилди. Биринчи бўлимда “Насаф” футболчилари бир нечта хавфли вазиятлар яратишди. 38-дақиқада Сардор Баҳромов рақиб дарвозаси тўсинига зарба йўллаб, ҳисобни очишга жуда яқин келди. Танаффус арафасида Рустамовнинг зарбаси эса аниқ чиқмади ва жамоалар майдонни голларсиз тарк этишди.

Иккинчи бўлимда ҳам учрашувда ҳисоб очилмади. 64-дақиқада Муҳитдиновнинг узатмасидан сўнг Ғолиб Ғайбуллаев бош билан рақиб дарвозасига зарба берди. Бироқ унинг ҳаракати ҳам аниқлик етишмагани сабабли гол билан якунланмади.

Шу тариқа, “Локомотив” ва “Насаф” ўртасидаги баҳсда ғолиб аниқланмади — 0:0.

Суперлига. 24-тур
“Локомотив” - “Насаф” - 0:0