Осиё футбол конфедерацияси (ОФК) президенти Шайх Салмон бин Иброҳим ал Халифа бошчилигидаги делегация Тошкент шаҳрида бир қатор объектларга ташриф буюрди.

Дастлаб делегация Миллий футбол марказида бўлиб, VAR маркази фаолияти, рақамлаштириш йўналишида амалга оширилган ишлар ҳамда тиббиёт маркази билан танишди. Шунингдек, ОФК вакиллари Янги Тошкентда барпо этилаётган стадионни ҳам кўздан кечирди.

Шундан сўнг делегация Тошкентда қад ростлаган Олимпия шаҳарчасига ташриф буюрди. 100 гектардан ортиқ майдонни эгаллаган ушбу мажмуа бир нечта спорт турлари учун мўлжалланган замонавий иншоотларни ўзида жамлаган. Мазкур объектлар халқаро миқёсдаги мусобақаларни юқори савияда ўтказиш учун зарур шароитларга эга.

ОФК президенти, шунингдек, Ислом цивилизацияси марказида ҳам бўлди. Ташриф давомида делегацияга Ўзбекистоннинг бой тарихий-маданий мероси, ислом цивилизацияси ривожига қўшган ҳиссаси ҳамда буюк алломаларимизнинг жаҳон илм-фани ва маънавий тараққиётидаги ўрни ҳақида маълумот берилди.

Шайх Салмон бин Иброҳим ал Халифа Ўзбекистонда спорт соҳасида амалга оширилаётган кенг кўламли ислоҳотлар, замонавий спорт инфратузилмаси ва яратилган шароитларни юқори баҳолади. Шунингдек, спорт объектларининг халқаро стандартлар асосида барпо этилгани ва жиҳозланганини эътироф этиб, мамлакатимизнинг қитъа ҳамда халқаро мусобақаларни юқори савияда ташкил этиш борасидаги тажрибасини алоҳида таъкидлади.

ОФК раҳбари Ислом цивилизацияси марказига ташрифи чоғида эса тарихий меросни асраб-авайлаш, уни халқаро миқёсда тарғиб этиш ва келажак авлодга етказиш борасида амалга оширилаётган ишларни ҳам юқори баҳолади.