«Барселона» бош мураббийи Ханс-Дитер Флик Испания Ла Лигасининг 9-тури доирасида «Бетис» устидан сафарда қозонилган 5:2 ҳисобидаги ғалабани сарҳисоб қилди.

«Ўйлашимча, ҳужумда жуда яхши ва юқори шиддат билан ҳаракат қилдик. Ўйин осон кечмади. «Бетис» ҳам ажойиб ўйин намойиш этди. Менимча, биз ғалабага муносиб эдик», — дея Фликнинг сўзларини келтиради Marca нашри.

«Машғулотларда стандарт вазиятлар устида ишлаш жуда муҳим. Иккинчи голимиз катта аҳамиятга эга бўлди, чунки у биринчи бўлим тугашидан олдин урилди. Стандарт вазиятлар учун масъул мутахассислар ўз вазифаларини яхши бажаришмоқда.

Ҳар куни бир хил ҳолатга дуч келамиз. Майдонга тушмаётганидан норози футболчилар бор ва бу табиий ҳол. Ушбу клубда, ушбу жамоада ҳар бир футболчи майдонга тушиш ва ўзини кўрсатиш имкониятига эга бўлади.

Жамоада ажойиб муҳит ҳукм сурмоқда. Барча футболчилар машғулотларда жуда юқори савия намойиш этишмоқда», — деди Флик.

Айни пайтда «Барселона» 27 очко билан Испания Ла Лигаси мусобақа жадвалида пешқадамлик қилмоқда.

Каталонияликлар навбатдаги учрашувини 20 октябрь куни Чемпионлар лигаси доирасида «ПСЖ»га қарши ўтказади.