«Барселона» ярим ҳимоячиси Родри Эрнандес Испания Ла Лигасининг 9-тури доирасида «Бетис»га қарши ўтказилган учрашувда Ламин Ямал томонидан урилган голга баҳо берди.

Ямал баҳснинг 10-дақиқасида рақиб дарвозасини ишғол қилди. Учрашув якунида каталонияликлар 5:2 ҳисобида ғалаба қозонишди.

«Ламин қандай ажойиб гол урди! У бизни бундай голларга аллақачон ўргатиб қўйган. Бу ерда ортиқча гапга ҳожат йўқ. Бундай футболчилар ўйин тақдирини ҳал қилади.

Аммо мен унинг бошқа фазилатларини ҳам алоҳида таъкидлаган бўлардим. Хусусан, майдонда бор кучини сарфлаши ва жамоадошларига ёрдам беришга доимо тайёрлиги таҳсинга сазовор», — дея Родрининг сўзларини келтиради Marca нашри.

Шунингдек, футболчи учрашувнинг 43-дақиқасида «Бетис»нинг голи бекор қилингани ва 54-дақиқада рақиб жамоа аъзоси Факундо Берналь майдондан четлатилгани ҳақида ҳам фикр билдирди.

«Ҳақиқатан ҳам, қўл ғайритабиий ҳолатда эди. Эҳтимол, айнан шу сабабли гол бекор қилингандир. Ҳакамларнинг қарорларини ҳурмат қилиш керак. Қизил карточка билан боғлиқ вазиятни эса кўрмадим», — деди испаниялик ярим ҳимоячи.

Айни пайтда «Барселона» 27 очко билан Испания чемпионати мусобақа жадвалида ишончли пешқадамлик қилмоқда.

Каталонияликлар 20 октябрь куни Чемпионлар лигасида «ПСЖ»га қарши майдонга тушади. Орадан беш кун ўтиб, 25 октябрда эса ўз майдонида Мадриднинг «Реал» клубини қабул қилади.