Мадриднинг «Атлетико» клуби бош мураббийи Диего Симеоне Испания Ла Лигасининг 9-тури доирасида «Эспаньол» устидан қозонилган 1:0 ҳисобидаги ғалабани сарҳисоб қилди. Учрашув тақдирини 89-дақиқада Алекс Баэна томонидан урилган гол ҳал қилди.

«Жуда муҳим уч очкони қўлга киритдик. Рақиб осонликча таслим бўлмади ва ҳимояда жуда яхши ҳаракат қилди. Бизда гол уриш учун имкониятлар бўлди, 90 дақиқа давомида ўйинни назорат қилдик, аммо узоқ вақт дарвозани ишғол эта олмадик.

Биринчи бўлимда ҳам гол уришимиз мумкин эди. Иккинчи бўлимда эса Хулианнинг вазияти айниқса ёдда қолди. Ўшанда дарвозабон ажойиб сейв амалга оширди», — дея Симеоненинг сўзларини келтиради Marca нашри.

«Учрашув 0:0 ҳисобида якунланадигандек туюлганди, аммо кейин биз ажойиб гол урдик!

Ҳужумни ҳимоядан бошлаб, тўпни майдоннинг бир қанотидан иккинчисига ўтказган ҳолда жуда чиройли комбинация ташкил қилдик. Баэна эса ақлбовар қилмас даражадаги ўйин намойиш этди.

Биз футболчиларнинг ўйин вақтини ва кучини тўғри тақсимлашга ҳаракат қилдик. Учрашувнинг турли босқичларида майдонга янги кучлар керак эди. Шу сабабли аввал Лукманни, кейин Баэна ва Ли Кан Инни майдонга туширдик.

Кути алмаштиришни сўраганидан сўнг Мендоса ўйинга қўшилди. Яхшиямки, ниҳоятда мураккаб кечган учрашувда ғалаба қозонишга муваффақ бўлдик», — деди аргентиналик мутахассис.

Айни пайтда «Атлетико» 22 очко жамғарган ҳолда Испания чемпионати мусобақа жадвалида иккинчи ўринни эгаллаб турибди.