Madridning «Atletiko» klubi bosh murabbiyi Diyego Simeone Ispaniya La Ligasining 9-turi doirasida «Espanyol» ustidan qozonilgan 1:0 hisobidagi g‘alabani sarhisob qildi. Uchrashuv taqdirini 89-daqiqada Aleks Baena tomonidan urilgan gol hal qildi.
«Juda muhim uch ochkoni qo‘lga kiritdik. Raqib osonlikcha taslim bo‘lmadi va himoyada juda yaxshi harakat qildi. Bizda gol urish uchun imkoniyatlar bo‘ldi, 90 daqiqa davomida o‘yinni nazorat qildik, ammo uzoq vaqt darvozani ishg‘ol eta olmadik.
Birinchi bo‘limda ham gol urishimiz mumkin edi. Ikkinchi bo‘limda esa Xulianning vaziyati ayniqsa yodda qoldi. O‘shanda darvozabon ajoyib seyv amalga oshirdi», — deya Simeonening so‘zlarini keltiradi Marca nashri.
«Uchrashuv 0:0 hisobida yakunlanadigandek tuyulgandi, ammo keyin biz ajoyib gol urdik!
Hujumni himoyadan boshlab, to‘pni maydonning bir qanotidan ikkinchisiga o‘tkazgan holda juda chiroyli kombinasiya tashkil qildik. Baena esa aqlbovar qilmas darajadagi o‘yin namoyish etdi.
Biz futbolchilarning o‘yin vaqtini va kuchini to‘g‘ri taqsimlashga harakat qildik. Uchrashuvning turli bosqichlarida maydonga yangi kuchlar kerak edi. Shu sababli avval Lukmanni, keyin Baena va Li Kan Inni maydonga tushirdik.
Kuti almashtirishni so‘raganidan so‘ng Mendosa o‘yinga qo‘shildi. Yaxshiyamki, nihoyatda murakkab kechgan uchrashuvda g‘alaba qozonishga muvaffaq bo‘ldik», — dedi argentinalik mutaxassis.
Ayni paytda «Atletiko» 22 ochko jamg‘argan holda Ispaniya chempionati musobaqa jadvalida ikkinchi o‘rinni egallab turibdi.
