Мадриднинг «Реал» клуби Лиссабоннинг «Спортинг» жамоасида тўп сураётган 15 ёшли ярим ҳимоячи Хакобо Афонсуга қизиқиш билдирмоқда. Бу ҳақда ESPN нашри хабар берди.
Манба маълумотларига кўра, «қироллик клуби» ёш футболчининг салоҳиятини юқори баҳоламоқда ва анчадан буён унинг ривожланишини диққат билан кузатиб келмоқда.
Афонсу марказий ярим ҳимоячи позициясида ҳаракат қилади. У жисмоний имкониятлари, майдон марказидан ҳужумларга фаол қўшила олиши ҳамда тўп билан муомала қилиш маҳорати билан ажралиб туради.
Ёш футболчи Испания ва Португалия фуқаролигига эга. У Испаниянинг Саламанка шаҳрида туғилган, бироқ Португалияда улғайган.
Афонсу аввал ҳам Испаниянинг турли ёш тоифаларидаги терма жамоаларига, жумладан, 16 ёшгача бўлган футболчилардан иборат миллий жамоага чақирилган.
«Реал» истиқболли ёш футболчиларни эрта ёшдан ўз академиясига жалб қилиш стратегиясини давом эттирмоқда.
Яқинда мадридликлар «Эспаньол» клубидан 14 ёшли Ян Вильяни ўз сафига қўшиб олди. Шунингдек, «Реал» 6 октябрь куни 16 ёшга тўлган Жей-Жей Габриэлнинг трансфери бўйича ҳам келишувга эришишга ҳаракат қилмоқда.
ESPN маълумотларига кўра, «Реал» Хакобо Афонсунинг ўсишини кузатишда давом этмоқда ва яқин ойларда уни ўз сафига қўшиб олиш имкониятини кўриб чиқмоқда.
