Россиялик миллиардер Алишер Усмонов Англиянинг “Эвертон” клубини сотиб олиш ёки унга катта миқдорда сармоя киритиш имкониятини кўриб чиқаётгани айтилмоқда. ТalkSport журналисти Алан Бразилнинг маълум қилишича, бизнесмен мерсисайдликлар клуби атрофидаги вазиятни диққат билан кузатмоқда.

“Бу маълумотни юз фоиз тасдиқлай олмайман, аммо эшитишимча, Усмонов яна ‘Эвертон’га қайтмоқчи. Унинг бунга молиявий имконияти етарли”, деди журналист.

Бойлиги 14 миллиард долларга баҳоланадиган Усмонов аввал ҳам “Эвертон”нинг собиқ хўжайини Фарҳод Мошири билан яқин бизнес алоқаларига эга бўлган. Улар биргаликда “Арсенал” акцияларининг бир қисмига ҳам эгалик қилган.

2017 йилда Усмоновга тегишли “USM Holdings” компанияси “Эвертон”нинг машғулот базасига ўз номини бериш ҳуқуқини 11 миллион фунт стерлингга сотиб олган. Кейинчалик компания клубнинг аёллар жамоасига ҳам ҳомийлик қилган.

Усмоновнинг “Эвертон”га эҳтимолий қайтиши ҳақидаги хабарлар клубнинг амалдаги эгалари — “The Friedkin Group” жамоани сотиш имкониятини кўриб чиқаётгани ҳақидаги маълумотлар фонида пайдо бўлди. Америкалик сармоядорлар клубни икки йилга ҳам етмаган вақт олдин сотиб олган эди. Яқинда клуб раҳбарияти янги харидор излаётганини расман тасдиқлади. Шу тариқа, Усмоновнинг клубга қайтиши мумкинлиги ҳақидаги тахминлар яна кун тартибига чиқди. Бироқ журналист Алан Бразил бу маълумотни ҳозирча тўлиқ тасдиқлай олмаслигини таъкидлаган.