«Рома»нинг собиқ сардори Франческо Тотти 2004 йилда Мадриднинг «Реал» клубига ўтишдан бош тортганини эслади. Италиялик футболчи бу қароридан бироз афсусланганини тан олди, бироқ уни хато деб ҳисобламаслигини таъкидлади.
«Йўқ, ўз қароримдан афсусланмайман, гарчи озгина афсус ҳисси бўлган бўлса-да. 2004 йилда «Реал»ни бежизга «галактикослар» жамоаси деб аташмаган — у ерда Бекхэм ва Зидан тўп сурарди. Ишончим комилки, улар билан бирга барча мумкин бўлган совринларни қўлга киритган бўлардим. Ҳатто «Олтин тўп»ни ҳам ютишим эҳтимолдан холи эмасди.
Аммо охир-оқибат ҳаммаси яхши якунланди. Ўшанда қарорни иккимиз — мен ва қалбим қабул қилгандик. Иккимиз ҳам бир хил хулосага келгандик».
