«Барселона» ҳимоячиси Эрик Гарсия бугун қўшимча тиббий текширувлардан ўтказилиши кутилмоқда. Жерар Мартин ва Жюль Кунденинг соғлиғи билан боғлиқ вазият эса жиддий хавотир уйғотмаяпти.
Журналист Хави Мигельнинг маълум қилишича, каталонияликлар тиббий штаби Эрик Гарсиянинг ҳолатини батафсил баҳолаш мақсадида қўшимча текширувлар ўтказади.
Тиббий кўрик натижалари ҳимоячининг жароҳати қай даражада жиддий экани ва жамоанинг яқинлашиб келаётган учрашувларида иштирок эта олиш-олмаслигига ойдинлик киритиши кутилмоқда.
Жерар Мартин ва Жюль Кунде билан боғлиқ дастлабки маълумотлар эса ижобий. Ҳар икки футболчининг ҳам ҳолати яхши экани ва уларнинг бўлажак ўйинларда иштирок этишига жиддий тўсиқ бўлмаслиги тахмин қилинмоқда.
Шу тариқа, «Барселона»нинг жароҳатлар билан боғлиқ хавотирлари бироз камаймоқда. Ҳозирча асосий эътибор Эрик Гарсиянинг тиббий текширув натижаларига қаратилган.
