«Тоттенхэм» бош мураббийи Роберто Де Дзерби жамоанинг Испаниянинг Марбелья шаҳрида ўтказган ўқув-машғулот йиғинидан кўзланган асосий мақсадни тушунтирди.

Италиялик мутахассиснинг таъкидлашича, мазкур йиғин футболчилар ўртасидаги муносабатларни мустаҳкамлаш ва жамоадаги ҳамжиҳатликни оширишга хизмат қилган. Унинг фикрича, «Тоттенхэм» натижаларини яхшилаши ва янада аҳил жамоага айланиши зарур.

«Ҳа, биз жуда яхши ишладик. Тўғриси, ўз базамизда ҳам машғулотларни яхши ўтказаётган эдик.

Аммо ўсиш ва ривожланиш керак бўлган пайтда барча имкониятлардан фойдаланиш лозим. Менимча, биз ўйин сифатини эмас, айнан натижаларимизни яхшилашимиз керак.

Шунинг учун жамоа сифатида янада кучлироқ ва яхшироқ бўлишнинг ҳар қандай йўлини излашимиз зарур», — деди Де Дзерби «Ковентри»га қарши учрашув олдидан ўтказилган матбуот анжуманида.

«Футболчилар биргаликда вақт ўтказишмоқда, кўп мулоқот қилишмоқда. Бундан мақсад шунчаки асосий таркибда майдонга тушадиган футболчилар гуруҳини эмас, балки ундан ҳам мустаҳкамроқ жамоани шакллантиришдир.

Мен футболда ҳақиқий жамоа, футболчилар ўртасидаги яхши муносабатлар ва ўзаро тушуниш жуда муҳим эканига ишонаман.

Биз майдондаги шерикларимизни яхши билишимиз, бир-биримизни тушунишимиз керак», — дея қўшимча қилди италиялик мураббий.

Айни пайтда «Тоттенхэм» Англия Премьер-лигасида 3 очко билан қуйи лигага тушиб кетиш хавфи мавжуд бўлган ҳудудда жойлашган.

«Ковентри» эса 6 очко жамғарган ҳолда мусобақа жадвалида 15-ўринни эгаллаб турибди.

Жамоалар ўртасидаги учрашув 19 октябрь куни бўлиб ўтади.