«Рома» клуби афсонаси Франческо Тотти футболчилик фаолияти давомидаги энг бахтли куни ҳақида берилган саволга жавоб берди.

— Ҳаётингиздаги энг бахтли кун қайси? Италия чемпионлигини қўлга киритган кунингизми ёки жаҳон чемпиони бўлган пайтингизми?

— Йўқ. Бу Кристиан туғилган кун эди. Ўша пайтда мен Мессинада ўйинда эдим. Туғуруқхонага етиб боргунимча, у аллақачон дунёга келганди.

Ўғлимни қўлимга олганимда, «бахт» деган сўз аслида нимани англатишини тушуниб етдим, — деди Тотти Corriere della Sera нашрига берган интервьюсида.

Қайд этиш жоиз, Франческо Тоттининг ўғли Кристиан ҳам отасининг изидан бориб, футболчи бўлишга ҳаракат қилган. Бироқ у 19 ёшидаёқ профессионал футболчилик фаолиятини якунлашга қарор қилган.

Афтидан, Тоттининг ўғли футболда ўз ўрнини топа олмаган. Айни пайтда Кристиан 20 ёшда.

Эслатиб ўтамиз, Франческо Тотти 2001 йилда «Рома» билан Италия чемпиони бўлган. 2006 йилда эса Италия терма жамоаси сафида Жаҳон кубогини қўлга киритган.