«Манчестер Юнайтед» ҳимоячиси Гарри Магуайр Англия Премьер-лигасининг 7-турида «Лидс»га қарши ўтказилган ва 1:1 ҳисобида якунланган учрашув ҳақида фикр билдирди.

Англиялик футболчи жамоанинг тактик тайёргарлиги ва ғалаба қозониш учун нималарни яхшилаш зарурлиги ҳақида гапирди.

«Бу ҳафта биз тактик схемамизни ўзгартириш устида ишладик. Тўпсиз ҳаракат қилганимизда рақиб билан бир хил схема асосида ўйнашни ва уларга фаол босим ўтказишни режалаштиргандик.

Биз майдон марказида устунликка эришишимиз мумкинлигини билардик, чунки рақибнинг бу ҳудудида атиги икки нафар футболчи бор эди», — деди Магуайр Sky Sports нашрига.

Ҳимоячи жамоаси айрим вазиятларда янада дадилроқ ҳаракат қилиши кераклигини таъкидлади.

«Ўйлайманки, айнан шу жиҳатда яхшироқ ўйнашимиз мумкин эди. Тўп билан ҳаракат қилганда жасоратлироқ бўлишимиз, рақиб прессингидан эса ишончлироқ чиқишимиз керак эди.

Ҳозир биз жасорат етишмаётган вазиятга тушиб қолдик. Уни қайта тиклашимиз шарт.

Ўйинларда ғалаба қозониш учун бизга жасорат ва совуққонлик зарур», — дея қўшимча қилди футболчи.

Қайд этиш жоиз, «Манчестер Юнайтед» Англия Премьер-лигасининг еттита туридан сўнг 7 очко жамғарган ҳолда мусобақа жадвалида 13-ўринни эгаллаб турибди.