«Рома» клуби афсонаси Франческо Тотти профессионал футболчилик фаолиятини якунлаганидан кейин бошдан кечирган руҳий қийинчиликлари ҳақида сўзлаб берди.
Италиялик собиқ футболчининг таъкидлашича, майдон билан хайрлашган куни унда бир-бирига зид ҳиссиётлар пайдо бўлган.
«Бир томондан, бу ҳаётимдаги энг яхши кунлардан бири эди. Чунки мени ўзига хос ва унутилмас хайрлашув маросими кутаётганди.
Бошқа томондан эса қалбимни ғамгинлик қамраб олганди. Гўё содир бўлаётган воқеаларга ишона олмасдим. Ичимда эса қандайдир бўшлиқни ҳис қилардим.
Бир пайт келиб, депрессия ёқасига бориб қолдим. Ҳеч нарсадан маъно топа олмай қўйгандим.
Чунки биз, футболчилар, муайян тартиб ва одатлар асосида яшашга ўрганган инсонлармиз», — дея Тоттининг сўзларини келтиради derbyderbyderby.it.
Эслатиб ўтамиз, Франческо Тотти 2017 йилда профессионал футболчилик фаолиятини якунлаган.
Италиялик афсонавий футболчи бутун фаолияти давомида фақат «Рома» шарафини ҳимоя қилган.
