«Аталанта» бош мураббийи Маурицио Сарри Италия А Сериясининг 7-турида «Милан»дан қабул қилинган мағлубиятдан сўнг ҳакамлик қарорларини танқид қилди.

Бергамоликлар 2:3 ҳисобида имкониятни бой берган учрашувда бир қатор баҳсли вазиятлар юзага келди. Саррининг фикрича, бош ҳакамнинг айрим қарорлари ўйин натижасига таъсир кўрсатган.

«Учрашув бошида бизга шиддат етишмади. Шу сабабли рақиб ҳимоядан осонлик билан ҳужумга ўта олди.

Кейинчалик ҳал қилувчи вазиятлар бизнинг фойдамизга ҳал бўлмади.

Ўйин давомида тўп қўлга теккан учта ҳолат кузатилди. Уларнинг иккитаси бизнинг жарима майдончасида содир бўлди ва ҳакам бу қоидабузарликларни қайд этди. Аммо учинчи ҳолат эътиборсиз қолдирилди.

Биринчи пенальти баҳсли вазиятдан кейин белгиланди. Футболчининг қўл ҳаракати табиий эди.

Агар шу мантиққа амал қилинса, рақиб дарвозасига ҳам пенальти белгиланиши керак эди.

Бундан ташқари, маълум бўлишича, энди футболчилар ҳакамни ҳақорат қилишлари ҳам мумкин экан. Бунинг учун улар ҳатто майдондан четлатилмаяпти», — дея Саррининг сўзларини келтиради pianetamilan.it.

Қайд этиш жоиз, «Аталанта» Италия чемпионатининг дастлабки еттита туридан сўнг мусобақа жадвалида ўнинчи ўринни эгаллаб турибди.