"Милан"нинг собиқ бош мураббийи Сержиу Консейсау 2025 йил ёзида клубдан кетишига таъсир кўрсатган бўлиши мумкин бўлган қизиқ воқеани ошкор қилди.
Португалиялик мутахассиснинг тахминича, унинг истеъфосига клуб эгаси Жерри Кардинале юборган хабарнинг жавобсиз қолгани ҳам сабаб бўлган бўлиши мумкин.
Консейсаунинг айтишича, у "Милан" билан Италия Суперкубогини қўлга киритганидан сўнг Кардиналедан табрик хабари олган. Бироқ кўплаб хабарлар орасида уни пайқамай қолган.
"Суперкубокни ютганимиздан кейин Кардинале менга хабар юборган экан. Аммо мен жавоб қайтармаганман, чунки ўша пайтда минглаб хабарлар келганди.
Орадан икки ой ўтгач, Златан менга Жерри хабар юборганини айтди.
Мен ҳайрон бўлиб, хабарни айнан менга юборганми, деб қайта сўрадим.
Ҳозир бу воқеадан жуда хижолатдаман", — дея Консейсаунинг сўзларини келтиради pianetamilan.it.
Эслатиб ўтамиз, Сержиу Консейсау "Милан"ни 2025 йилнинг январидан июнигача, тахминан олти ой давомида бошқарган.
