"Милан" ҳимоячиси Марио Хила Италия А Сериясининг 7-турида "Аталанта" устидан қозонилган ғалабадан сўнг жамоасининг ўйинига баҳо берди.

Миланликлар 3:2 ҳисобида устун келган бўлса-да, учрашувнинг иккинчи қисмида ташаббусни рақибга бой бериб, ғалабани қўлдан чиқариш хавфига дуч келишди.

Хиланинг фикрича, жамоа дастлабки 65 дақиқа давомида майдонда устунлик қилган, аммо кейинчалик ўйин тизими бузилган.

"Биз 65-дақиқагача ўйинни тўлиқ назорат қилдик. Кейин эса жамоавий тартибни йўқотдик.

Тўпни имкон қадар тезроқ ҳужумга етказишга уриндик. Натижада ўйин устидан назоратни қўлдан чиқардик.

Бу, албатта, ачинарли ҳолат. Аммо буюк жамоалар шундай қийин учрашувларда ҳам ғалаба қозонишни билади", — дея Хиланинг сўзларини келтиради pianetamilan.it.

Эслатиб ўтамиз, испаниялик ҳимоячи ўтган ёзда "Милан" сафига қўшилган эди. Бунгача у Римнинг "Лацио" клубида тўп сурган.

Қизиғи, Хила баҳорда "Лацио" сафида айнан "Милан" дарвозасига ғалаба голини киритган эди.