"Арсенал" бош мураббийи Микель Артета Англия Премьер-лигасининг 7-турида "Ноттингем Форест" устидан қозонилган ғалабани таҳлил қилди.
Лондонликлар сафарда 1:0 ҳисобида устун келишган бўлса-да, рақиб ҳимоясини ёриб ўтишда жиддий қийинчиликларга дуч келишди. Артетанинг таъкидлашича, учрашувнинг биринчи бўлимида жамоаси дарвозага бирорта ҳам аниқ зарба йўллай олмаган.
"Ҳимоясини ёриб ўтиш қийин бўлган жамоаларга қарши ўйнаганда баъзан асабийлашиш мумкин.
Биринчи бўлимда дарвозага бирорта ҳам аниқ зарба бермадик. Танаффусда айнан шу масалани муҳокама қилдик.
Иккинчи бўлимда яна иккита ажойиб имкониятга эга бўлдик. Аммо дарвозага йўлланган ягона аниқ зарбамиз кичик рикошетдан кейин голга айланди", — деди Артета.
Испаниялик мутахассис ғалабада захирадан майдонга тушган футболчиларнинг ҳиссаси катта бўлганини ҳам таъкидлади.
"Нони Мадуэке, Юрриен Тимбер ва Микель Мерино ўйинга жуда яхши қўшилди. Виктор Дьёкереш эса учрашувнинг боришини ўзгартирди.
Уларнинг барчаси жамоага фойда келтирди. Бизга айнан шу керак.
Албатта, Нонини алоҳида таъкидлаш лозим. Чунки у ўйин тақдирини ҳал қилган голни урди.
Голдан кейин футболчиларимиз жуда яхши муносабат билдирди. Улар мураккаб ва кескин вазиятда ҳимояланиш учун катта иштиёқ намойиш этишди", — дея Артетанинг сўзларини келтиради BBC.
Қайд этиш жоиз, "Арсенал" айни пайтда Англия Премьер-лигаси турнир жадвалида иккинчи ўринни эгаллаб турибди.
Лондонликлар 21 октябрь куни Чемпионлар лигасида "Бавария" меҳмони бўлади. 24 октябрда эса АПЛ доирасида "Эвертон"га қарши майдонга тушади.
