Англиянинг «Уотфорд» клуби ярим ҳимоячиси Эдоардо Бове келажакда Италия А Сериясига қайтиш эҳтимолини истисно этмаслигини билдирди.
Аввалроқ «Рома» ва «Фиорентина» шарафини ҳимоя қилган футболчи ҳозирги жамоасида ўзини бахтли ҳис қилаётганини, бироқ Италия футболи билан алоқасини узмаганини таъкидлади.
«Италияга қайтиш? Келажакда нега энди йўқ? Ҳозирги жамоамда ўзимни бахтли ҳис қиляпман.
Фаолиятимдаги мақсадларимдан бири хорижда ўйнаш эди. Аммо Италия чемпионатини ҳамон кузатиб боришимни яширмайман.
“Рома” ва Италияга бўлган меҳрим сақланиб қолган. Ҳозирги ҳолатимдан мамнунман, лекин келажакдаги ҳеч бир имкониятдан воз кечмоқчи эмасман», — дея Бовенинг сўзларини келтиради Calciomercato.
Жорий мавсумда Бове «Уотфорд» сафида барча мусобақаларда 7 та учрашувда иштирок этди.
Айни пайтда «Уотфорд» Англия Чемпионшипи турнир жадвалида 20-ўринни эгаллаб турибди.
